2Cor 12 | KYG | STEP | Nagai'nie'mo namogaga aisuvana naha o'maegaiye. Atale'na Ala kava ne'mo'a alino nave li'nige'na alagamuna agegekana hu'na age'nova kavafe'mo lapa paiguve.

2 Corinthians 12

Polo'a alagamuna agegekana huno age'niya kavafe'mo ava gemo hu'niya gemae

1 Nagai'nie'mo namogaga aisuvana naha o'maegaiye. Atale'na Ala kava ne'mo'a alino nave li'nige'na alagamuna agegekana hu'na age'nova kavafe'mo lapa paiguve. 2 Nagaemo mago Kalaisipi'mo ne'maiya vekamo age'nove. Akeya'vilaga fotini'a kafugamo Goti'a ani vekamo avalelino haino napa tali koku'napi'mo ate'niye. Agufafi'mo mai'nifi o'mai'nifi hu'na o'age'novana Goti'a age'niye. 3 He, ani vekamo age'novana agufafi'mo mai'nifi o'mai'nifi hu'na o'age'novana Goti'a age'niye. 4 Goti'a Palanaisi kote'mo avalelino haino ate'niyanage'a afa'a ae'a hakalo osisaya agufa gee'mo Goti'a, ge osuvo, huno ha pai'niya gemo afi'niye. 5 Nagaemo ani vekae'mo namogaga aiguva'monanafa nagai'nie'mo namogaga o'aigufa nayamufa nosuva kavafe'mo afa'a namogaga aiguve. 6 Nagaemo nagai'nie'mo namogaga aiguve, hu'na hisuvana negi gemo osu'na lama gemo huguva'monanafa nagai'nie'mo namogaga aite'na nagi'nile'mo afa'a ali'na asaga osuguve. Nehuva kava'mo agege nehuva gemo afige nehutapae'mo nagaefe'mo alagepa hutapa lapakesamo afisayafe'mo nahau'niye. Fiku yanagetapa mago'e hutapa nagi'nile'mo alitapa asaga hutegae.

7 Goti'a mago'e ya'mo alino nave li'niya'monanafa ani yatefe'mo nagi'nile'mo ali'na asaga hu'na o'natesuvafe'mo mago aufe'e yakana yateti'mo nagufale'mo namagi'niye. Ani yatefe'mo nagi'nile'mo ali'na asaga hu'na o'natesuvafe'mo Satani apa veka'amo'mo eno namagi'niye. 8 Nagaemo ani kava'mo hu'niya kavatefe'mo Ala kava nefe'mo lole'e mago'e afina'mo, alika atalo, hu'na aukaya hu'na ge hu'nove. 9 Hu'na aukaya hu'nova'monanafa naha paino'ae'mo, Fiku kaha mae'na kamisugeno kaha maesiya'mo'mo alagimae. Na kava hinage'naene. Himamu'nimo'a lokiya no'vaiya kavateti'mo alagepa huno afole ne'aiye, huno naha pai'niya'mofe'mo Kalaisi himamu'amo nagaete'mo emineno hanesiyafe'mo lokiya no'vauva kavafe'mo amuse hute'na namogaga aiguve. 10 Aiguva'mofe'mo Kalaisi agi'alefe'mo lokiya no'vauva kavanagi hu'a faipa hu'a ne'nataya gegi kafu nehuva kavanagi apaini hu'a ne'nataya kavanagi hanageke ya'mo ne'aluva kavatefenagi hu'na lusi kava hu'na namogaga aiguve. Na kava'mo hige'naene. Lokiya no'vai'nae'mo lokiya vai'na mai'nova'mofe'mae.

Polo'a Kolitiyani vaya'aife'mo agesamo afi'niya gemae

11 Negi vekagana hu'na negi gemo hu'nova'monanafa ani kavatefe'mo alita he titapa nate'nae. Naha maetapa nagi'nile'mo alita asaga hutapa nate'naesinana kanale kava'mo hu'naesine. Afa vekamo mai'nova'monanafa hogote'a ae'a apakase'naya apa vayatapimogi ae'a o'nagase'naya vekamo mai'nove. 12 Nagaemo apa vaya'mogi nehaya agufa alagena kava'mo lapakaetegamo hu'nove. Nagaemo hanageke ya'mo ali'ne'nae'mo o'atale'na atafau'na alagi hu'ne'na Goti'a alino apave li'nige'a hapau ne'aiya agufa aune kava'mo hu'nove. 13 Na agufa kavatefe'mo siosi'ale siosi'ale'mo mai'naya vaya'ai apakamelaga mai'nae. Lapakaemo apakamelaga o'mai'naya'monanafa magoke kavateti'mo yagaitapa natesaya agufa kava'mo osu'nova kavatefe'mo apakamelaga mai'nae. Vaehae, nahau'nimogitapae, hu'na, ani hosu kava'nimo alita ataleyo.

14 Lole afina'mo utesige'na hemenimo halate lapakaetegamo u'na maisuvafe'mo alo hu'na mai'nove. Nagaemo kagemi yatapimo alisuvafe'mo o'nahau'niya'monanafa lapakaeke'mo alisuvafe'mo nahau'niya'mofe'mo alagepa hu'na maisuvafe'mo yagaitapa natesaya agufa kana ya'mo ali'na olapamiguve. Lapakaemo ago age'nayana mafa'ne'apimogi ita'api afo'apimogimo alagepa hu'a maisaya ya'mo ali'a anupa hu'a malesaya kava'mo ohane'nifa ita'api afo'apimogige'mo mafa'ne'apimo alagepa hu'a maisaya ya'mo ali'a anupa hu'a malesaya kava'mo hane'niye. 15 Hane'niya'monanafa nagaemo lapa maesuvafe'mo lusi kava huno nahau'niyanage'na muki ya'nimo afa'a atalegauve. He, lapa maesuvafe'mo alagepa hu'na ne'mauva kava'ni'e'mo afa'a atalegauva'monanafa lapakaefe'mo nahau nayamopafi'mo nahau'niya kava'nimo'a kosime kosime nehaigeno'ae'mo lapakaemo nagaefe'mo lapau lapayamopafi'mo lapau'niya kavatapimo'a aise aise huno lapaume lapaume nelamiye. 16 Nelamiya'monanafa mago'amogitapamo hutapae'mo, Alagepa huno maisiyafe'mo yagaita atesuna agufa kana ya'mo alino olami'niya'monanafa humi nami gemo nehiya vekamo mai'niya'mofe'mo aigofe geleti'mo huno latafauno late'niye, hutapa nehae. 17 Nagaemo mago vaya'mo ali'na apate'noge'apae'mo lapakaetegamo u'naya vaya'aiteti'mo aigofe gemo hute'na mago yatapimo kumaya'mo ali'nofiye. 18 Nagaemo Taitasina ali'na he ti'na atete'na mago konagatimo'e'mo ali'na anate'noge'ana lokae'ana u'na'ae. Taitasi'a uno'ae'mo lapakaefe'mo aigofe yuna gemo huteno mago yatapimo kumaya'mo ali'nifiye. Nagae'e agae'e'mo magoke la'aipa la'agesamo ali'neta'a magoke kate'mo o'u'no'afiye. 19 Lapakaemo mani gemo alita lekana paitetapae'mo, laulagale'mo halate apakai'api hapa maesiya gemo nehae, hutapa lapakesamo ne'afifiye. Ha'ao, Kalaisipi'mo mai'netae'mo Goti aulagale'mo ani gemo nehune. Nahau nayamopafi'mo nahau'niya vaya'nimogitapae, hu'na, muki kava'mo nehutae'mo lapa maesuna kava'e'mo nehune. 20 U'na lapakesuvana o'nahau'nisiya kava'mo hutapa mai'nisage'na lapakesufi hu'na hute'na koli nehuve. O'nahau'nisiya kava'mo nehisayana nagae'e'mo olapau'nisiya kava'mo lapakaetegamo huguve. Hosu kavanagetapa ge vaige lapaipa kafa hapaege falo gemo huge lapaote lapaote hutapa maige huta faipa hutapa apatege sumi sumi gemo huge lapakufamo avalelitapa haige lapano aege hutapa ne'maiye. 21 Fiku yanage'na halate lapakaetegamo visugeno'ae'mo Goti'nimo'a lapaulagale'mo navagage hisiya ya'mo alino namigiye. Hogotetapa asole vaya'amogitapamo kavatapile'mo o'yagaitapa o'ani'ya kava'mo huge kumai kava'mo huge afela afugana hutapa hosu lapa'ye huge hutapa mai'nisaya vaya'mogitapamo halate lapaipamo alitapa afe ole'nisayana yulagefa aiguve.